ທະນາຄານຮົງກົງ ແລະ ບໍລິສັດ Shanghai Banking Corporation (HSBC) ໄດ້ປະກາດການຊື້ກິດຈະການທະນາຄານ Silicon Valley Bank (SVB) ສາຂາສະຫະລາຊະອານາຈັກ ຫຼັງຈາກທະນາຄານໄດ້ປະກາດລົ້ມລະລາຍໃນວັນສຸກທີ່ຜ່ານມາ (ວັນທີ 10 ເດືອນມີນາ ປີ2023).

ທາງ HSBC ຢືນຢັນວ່າ ໄດ້ນໍາເອົາບໍລິສັດຍ່ອຍ HSBC UK ເຂົ້າຊື້ສາຂາຂອງ Silicon Valley Bank ຂອງສະຫະລາຊະອານາຈັກ ໃນລາຄາພຽງແຕ່ 1 ປອນ (1,21 ໂດລາ). ໂດຍຊັບສິນ ແລະ ໜີ້ສິນຂອງທະນາຄານ Silicon Valley ບໍລິສັດແມ່ ຈະບໍ່ຖືກລວມເຂົ້າໃນຂໍ້ຕົກລົງນີ້.

Noel Quinn CEO ຂອງ HSBC Group ກ່າວເຖິງຈຸດປະສົງໃນການເຂົ້າຊື້ຄັ້ງນີ້ວ່າ: “ເພື່ອເສີມສ້າງຄວາມເຂັ້ມເເຂງໃຫ້ກັບ franchise ທະນາຄານການຄ້າຂອງພວກເຮົາ ແລະ ເພີ່ມຄວາມສາມາດໃນການຮັບໃຊ້ບໍລິສັດທີ່ມີນະວັດຕະກໍາ ແລະ ການຂະຫຍາຍຕົວທີ່ວ່ອງໄວ, ລວມທັງໃນຂະແໜງເທັກໂນໂລຢີ ແລະ ວິທະຍາສາດເພື່ອຊີວິດ​ໃນສະຫະລາຊະອານາຈັກ ​ແລະ​ ນານາຊາດ”

Jeremy Hunt ລັດຖະມົນຕີກະຊວງການເງິນອັງກິດ ໄດ້​ເນັ້ນ​ໜັກ​ເຖິງ​ຜົນ​ປະ​ໂຫຍດ​ຂອງ​ຂໍ້​ຕົກ​ລົງດັ່ງກ່າວ​ວ່າ “ຮັບປະກັນໄດ້ວ່າ ເງິນຝາກຂອງລູກຄ້າຈະໄດ້ຮັບການຄຸ້ມຄອງ ແລະ ສາມາດໃຊ້ບໍລິການທະນາຄານໄດ້ເປັນປົກກະຕິ”

“ຂະ​ແໜງ​ເທັກ​ໂນ​ໂລ​ຢີ​ຂອງ​ອັງ​ກິດ​ແມ່ນ​ຜູ້​ນຳລະດັບ​​ໂລກຢ່າງ​ແທ້ຈິງ ແລະ ຍັງມີຄວາມສໍາຄັນອັນໃຫຍ່ຫຼວງຕໍ່ເສດຖະກິດອັງກິດ ເນື່ອງຈາກເປັນຂະແຫນງການທີ່ສະໜັບສະໜູນການຫາວຽກຫຼາຍກວ່າເເສນຕໍາເເໜ່ງ” Hunt ກ່າວຕື່ມ.

ທີ່ມາ : https://cutt.ly/B88DTUU